عاصمة الحديد والنار
بسم الله الرحمن الرحيم
اخي الزائر سلام الله عليك
مرحبا بك في منتديات عاصمة الحديد والنار وحبابك الف في عطبرة
هذه الرسالة تدل علي انك غير مسجل لدينا , فإن كنت عضوا تفضل بالدخول وإن لم تكن عضوا تفضل بالتسجيل بعد قراءة قوانين المنتدى الموجودة هنا :
http://atbara.forumn.org/t1-topic#1
وللتسجيل في منظمة عطبرة الخيرية تفضل بقراءة هذه المعلومات :
http://atbara.forumn.org/t6330-topic

ولك التحية


اهلاً وسهلاً وحبابك عشرة بلا كشرة يا زائر فى منتديات عطبرة عاصمة الحديد والنار
 
الرئيسيةالتسجيلدخول

شاطر | 
 

 قصه مغترب والزواج

اذهب الى الأسفل 
كاتب الموضوعرسالة
أبووردة
مشرف سابق
مشرف سابق
avatar

عدد الرسائل : 2567
1 :
تاريخ التسجيل : 15/05/2009

مُساهمةموضوع: قصه مغترب والزواج   الثلاثاء مايو 17, 2011 1:20 am

قبل كم سنة كدا كان نويت اخطب وزي اي مغترب محتار اخطب منو واعرس منو .... فكرت كويس قلت ما دام الواحد ما راجع قريب لي السودان يشوف واحدة من بنات المغتربين الموجودين هنا .. وبدأت البحث......
انتظاري لم يطول فقد وصلت سريعا حيث وقعت عيني علي زول بناتو كبار بزورونا طواااالي حيث كنا نسكن عزابة بمستويات مختلفة فينا كبار وفينا صغار وفينا الموظفين والشغالين اعمال حرة وهلم جرا ,, خلاص قلت اشوف واحدة من بنات عمك دا والسلام وهو صديق احد اعمامنا الموجودين في البيت وهو من منطقتنا وشوفتا تعاملو وكرمو معانا كيف وترحيبو الحار بينا ودعوتو لينا باستمرار في كل المناسابات وكل خميس عمك بجينا البيت يتونس معانا ويشرب الشاي ويضرب معانا اكل العزابة عادي طبائع الزول دا عجبتني شديد وبعدين هو وسيم برغم انو كبير قلتا لي نفسي يا اخوي ما بتلقي زول احسن من دا ,, المهم استفسرتا جاي جاي لقيت عندو بت يادوب اتخرجت من الجامعة وهي شهادة عربية وحتكون فاهمة البلد -- سماحتها دي هي الباقية لي هل هي سمحة ولا شينة ؟؟؟ والله دا الباقي لي اعرفو ,,, بس كيف ؟؟ المهم انا قعدتا شهر اسال شوية شوية واجرجر عمنا الساكن معانا في الكلام برغم انو حسا بيا لكن هو زاتو ذي ما شافهم - قدر ما حاولتا اشوفها بقي لي صعب بس ربنا فرجها بزوجة خالي بعد ما جابها معاهو وطبعا هي قريبتي وبت حلتي يعني ما غريبة علي وخالي زاتو كان ساكن معانا بس هي جديدة في الغربة والحكاية محتاجة ليها صبر مني لحدي ما تتعرف عليهم وتتعود علي البلد ,, ما مشكلة نحن ورانا حاجة ؟؟
مرت الايام لحدي ما شوفتا عمك باسرته داخلين علي بيت خالي وطبعا كلهن اسود في اسود وعينك ما تشوف شئ كلوكلو -- اها الفرصة جات لحدي عندي وما بضيعها ,, تاني يوم طوالي مشيت ليك لي مرة خالي وقلت ليها : ناس فلان جوكم امس شايف ..
- اي والله ناس ظريفين .
- وجكسيهم كيف ؟؟
- ها بوهية مغتربين ساي
- هههه كيف يعني ؟؟؟
- هوووووووي شوف ليك واحدة من السودان وخلاص .
طبعا ما وصلتا معاها لي اي حاجة رغم انها شكرتهم بدون ما تقصد وادتني فكرة ما بطالة عنهم بس لسه محتار .. وقالو صاحب الحاجة ارعن عشان كدا اتحمست زيادة وانا بدردق في عمنا المعانا في البيت وابو البت في الونسة والعرس والجماعة حسوا بحاجة كدا عرفوا انو انا عندي نية زواج هنا في السعودية - والله ابو البنية طوالي قلب الموجة علي واهتمامو زاد بي شوية وكل ما يجي يسال الجماعة عني وهاك يا اتصالات وشاي مغرب وعمك اي برنامج عندو يتصل علي عشان اكون معاهم ,, غايتو خفتا قلت يمكن الزول دا الظاهر بناتو ديل بايرات ولا شينات شديد وعاوز يفكهم فيني ولا ما عارف شنو والله اول مرة اخاف زي كدا وانا زول مغامر ما بخاف من شئ مقتنع بيهو ... بس عمك دا حيرني من حركاتو معاي يا ربي انا فيني شنو عجبو ؟؟ وكمان ام البنية اتعرفت علي وقعدت كذا مرة ونستني هي وعمك وبصراحة الام قمة في الجمال دا الحيرني فيهم زيادة الاب وسيم والام جميلة زي دا معقولة يلدو ليهم شيتا لالالالالا ---الموضوع كان كدا فيهو شئ تاني غير السماحة وحسيت ليك اني زولا مهم خالص وما عارف نفسي وما مديها حقها لكن ما بطغي في الفاضي ---
الام والابو لمن شافوني ما عملت اي خطوة لقدام برغم كل العملو معاي دا ,,, قالوا احسن نشوف لينا طريقة نلاقي الجماعة ديل بدون ما يحسوا .........
اها يوم ابوها اتصل علي وبعد التحية قال لي : انا عاوز منك خدمة بسيطة ؟؟
فقلت : خير ياعمي مافي مشكلة قول .
قال : انا اليوم تعبان شوية والاولاد وامهم دايرين يمشوا يتسوقوا ممكن تجي توديهم؟؟
فقلت : جدا ولا يهمك حاضرين ... وكبكبة شديدة
.... طوالي بعد صلاة العشاء جيت لي الجماعة وديتهم السوق وانا سايق غلبتني ما قادر اركز عشان ما تنكشف الرجفة سائق بي خمسين بس وعلي طرف الشارع وحتي امهم قالت لي : انت سواقتك رايقة خلاص ,, وهي ما عارف حاجة ساي يعني انا لوم ماسمعتا صفارة السرعة ما بتكيف كلو كلو وكمان بعد مرات تخييط في الطريق ......... المهم نزلنا وهاك يا نظرات ورشاقة جبتها من وين ما عارف اليوم داك - والبت فاهمة الحكاية واتاري هي زاتها عاوزة تشوفني وتعرفني وهي كمان ملوها كلام وجاهزة هي شايفة كل شئ وانا ماشايف غير برقع مغطي وشها بس الحمد الله كا لابسه ليها نظارة قعر كباية - غايتو صوتها نااااااااااااااعم وكلامها براااااااااااحة ومشيتها غزالة بس وهي متوسطة في الطول والحجم ومخصرة ومفصلة والله حبة كرش مافي ولا العباية ماعارف - ولونها خمري جميل -بس قلتا دي زولتي والمواصفات دي كفاية والباقي ما مهم لان الباقي حيكون تمام التمام ومن امها عرفت اسمها وامها ماقصرت معانا في الونسة بعد ما اشترو حاجاتهم جلسنا قدام حديقة مركز التسويق نرتاح شوية من كترت اللف - بس بي صراحة طلعوا ظريفين ما خلوني ادفع ريال واحد من جيبي قدر ما اقول ادفع امها تحلف ذي الراجل - دحين ناس زي ديل الواحد بيفرط فيهم - المهم الام عملت فيها عندها مكالمة وزحت مننا شوية كدا - طوالي انا ما كضبتا وبدات اتونس معاها شوية شوية واتبادلنا ارقام الجوالات وبدات الحكاية تستوي والبسمات ظهرت و..و... وزحت برقها وكتها انكشف قمر تقول لي القمر شنو وانا اقعد اعاين بس - دي كيف طلعت من السودان من غير ما تتزوج - ولا الناس القرو معاها عماية ولا انخلعوا بسماحتها دي وخافو منها - مرة اشبهها بمني زكي لا اقول هيفاء وهبي -- المهم زولة تسحر عديل كدي من جمالها والعجيب بمستها ووجاناتها -- قلتا يا زول انت كان كدي انت وقعت في كنز وما توري زول يخطفها منك زي ما بقولو قرض علي كدا ... شوية كدا وامها نادتنا عشان نمشي وانا محل السيارة واقفة نسيتو وامها تضحك فيني وتقول لي : انت ولد نساي شديد ... وهي ما عار فة حالتي من جوة كيف وكرعيني اشوفين خفيفات ارفع كراع وما عارف اوديها وين وراسي لافي لفة شينة خلاص دا كلو من الاغتراب الواحد لو شاف ليهو واحدة سمحة ساي بيتبهدل ويقطع في الكلام وعيونو ما يقدر يرفعها في وشها .. .
وصلتهم البيت وانا دخلتا البيت كاضم لا نضمي ولا حتي سلام عليكم سارح في خلاء الله البعيد ودخلت وطوالي علي السرير ونوم مافي والحمد الله اليوم التاني جمعة يعني الله لطف من دوام البلد دي اللي يكرهك الريالات ,,,
ااااااااااااه انا من الغربة ذكرتوني السودان ........

ونتــــــــــــــــــــــــــــــــــــــــــابع
الرجوع الى أعلى الصفحة اذهب الى الأسفل
أبووردة
مشرف سابق
مشرف سابق
avatar

عدد الرسائل : 2567
1 :
تاريخ التسجيل : 15/05/2009

مُساهمةموضوع: رد: قصه مغترب والزواج   الثلاثاء مايو 17, 2011 1:22 am

مر اسبوع بالتمام والكمال وانا الشوق كاتلني عشان اشوفة تاني وعمك من اليوم داك تاني ما شفتو - ومرتو بتكون اديتو الشمار طازج...... طبعا لا في درب مدرسة ولا عمود ولا ضل حيطة اقعد انتظرها فيهو وما بقدر امشي بيتم من دون شغلة - يا زول قلت اتوكل علي الله وادق ليها تلفون واكلمها واسمع صوتها الحماني النوم اسبوع كامل - وافتش التلفون طبعا كاتبو بي اسم واحد هندي عشان لو نائم وواحد هبش التلفون ما يعرفو -- ودقيت عليها وتلفونها يرن ...... ومافي رد خلاص انا انتهيت ,, قلت الزولة دي نستني والظاهر عليها ما ركبتا ليها في راسها وقعدتا احلل في حركاتي وكلامي معاها يا ربي هضربتا ليها بكلام كدا ولا كدا يا ربي البت دي ما عجبتها والكلام يدور في راسي ويودي ويجيب وانا قاعد جوة الاوضة والوقت عصرية واحد من الشباب حس بي ما طبيعي لي اسبوع كدا جاني داخل وقال : يا احمد مالك الايام دي نعل ما عيان ؟؟ وكان عمنا صاحب ابو البنية قاعد معانا قال ليهو : اسكت ساي زولنا دا ممحون محنة جد ويضحك ويعاين لي ... طبعا عمك كبير بس زول نكتة -- يرد ليهو : كيفن الكلام دا مالو عربيتو انسرقت ولا يمكن فصلو من الشغل ؟؟ وبصراحة ما قدرت اسكت وارد عليهو طوالي : المحنة الا تكون مصية !!! امكن عاوز اعرس . ويضحك : والله العرس محنة جد ,, الله يتم ليك ومالك شايل هم كدي ؟؟ موش الشنطة دي بنلمها ليك تاني في حاجة -- وارد عليهو : ياخ انا بقول امكن عاوز اعرس -- وانسحب طوالي واغمز لعمنا ما توريه حاجة واطلع برة -- قلبي ياكلني تاني واقوم اتصل بس برضو ما رد وقربتا ابكي من الشرة وعدم التعبير ... خلاص الزولة دي مسحتني باستيكة ,, هسع عليك الله في داعي للتعب دا كلو شهور وانا داير اشوفها ولمن اشوفها تطنش الطنيشة دي ,, يا زول لازم تاني اتصل عليها واوريها هي منو ولا اقول ليك رسل ليها رسالة العن اليوم الشفتها فيهو ... لالالالالا الرسالة دي دليل بيتحسب عليك عليك ياخي هي حرة ما عاوزاك هو بالغصب ... بقيت لافي زي المجنون ما عارف امشي وين ولا اسوي شنو ونفس مافي لي اي شئ حتي النوم زاتو ابي لي اسوي شنو والعرق نازل مني وجسمي سخن ونبضي زاد من الزعل واحباط شديد والوقت داك كان واحد ناضمني ساي بطرشق فيهو ....
مرت ساعتين وانا في الحال دا في شد وجذب بس فجاة تلفوني ضرب واقوم اشوف دا منو المتصل كان القاها ليك زولتي وهزيت راسي زي الهندي وما صدقت - وقلبي برد شوية وشلتا نفس وخليتها لمن كملت النغمة وقمت اتصلتا عليها ....
- الو ,, سلام عليكم ,, كيفك ؟؟
- تمام ,, وانت ؟؟
- كويس الحمد الله
- معليش كنت نائمة وختيت الجوال في الصامت
شلتا نفس طوييييييل وقلت ليها : انشاء الله نوم العوافي وانشاء الله ما اكون
ازعجتك بس .
- ابدا والله مافي ازعاج
والونسة جرت ووصلت لحدي : هوايتك شنو ,, اكلتك وما بعرفوا شنو وماشين في الغريق والكلام كلو مجاملات وكلمات كان قالو لي عيدها مرة تانية ما بقدر اعيدها جبتها من وين ما عارف ,, في اللحظات الزي دي الواحد بيكون خيالو خصب والخشم تب ما بيقيف من التكشم والبسيم -- ودعتها بعد ما شلتا منها الايميل عشان نشوف بعض ونتقابل بي راحتنا بس وين مع الشواطين العندنا الفي البيت ,, المهم مافي حل غير الكافية الجنبنا . وكلام ريدة بالماسنجر عمري ما حسيتو الا معاها وبقيت لمن اشوف صورتها ساي برتاح وهي كمان بتقول لي نفس الشئ ,, طبعا الاب والام شكلهم مراقبين الوضع وجايبين خبر وعاملين فيها ما شايفين ولا سامعين لانو عاوزيننا نتعرف اكتر .
استمر الوضع دا فترة ويوم رسلت لي رسالة قالت لي : انا ماشة السودان اجازة شهر وجاية مع امي واخواتي ,,, طبعا ما عندها اخوان الا ولد صغير كدا عمره تمنية سنين ,, كيفن الكلام دا نحن غرقنا خلاص دايرة تمشي وتسيبيني كدا؟؟ قلتا شهر ما كتير وودعتها وطلبتا منها لمن تمشي السودان ترسل لي رسالة من موبايلها هناك عشان اعرف رقمها واقدر ادق ليها وماقصرت طوالي ادتني رقمها وبقيت اتصل عليها بالليل ونوم مافي والمصري بتاع البقالة الجنبنا بقي صاحبي من كترت كروت الشحن البشتريها منو .
يوم دقيت عليها قلتا ليها انا ما قادر اصبر وجاي السودان عديل عشان اخطبك انا بكلم ابوك هنا وبشوف رايو شنو وبكلم ناس بيتنا يبقوا جاهزين .. البت ادربكت بس في النهاية اقتنعت وقالت لي خلاص بس نشوف بعض قبل ما تجيب اهلك - طبعا انا لاعندي اجازة ولا اي شئ طوالي مشيت لي ناس الشغل وقدمتا طلب اجازة طارئة خمستاشر يوم وبعد تلتلة وتحانيس ادوني ليها وعلي حسابي وطوالي للسودان
واااااااااااااااااااااااااااااه انا من السودان ..............

.............ونواصـــــــــــل
الرجوع الى أعلى الصفحة اذهب الى الأسفل
عبدالفتاح بن سعيد
عطبراوي ذهبي
عطبراوي ذهبي
avatar

عدد الرسائل : 1023
1 :
تاريخ التسجيل : 21/04/2010

مُساهمةموضوع: رد: قصه مغترب والزواج   الثلاثاء مايو 17, 2011 12:30 pm


ياناس اللبن هوي؟وصلتوا وين ؟
الرجوع الى أعلى الصفحة اذهب الى الأسفل
yassir
عطبراوي مجتهد
عطبراوي مجتهد
avatar

عدد الرسائل : 268
1 :
تاريخ التسجيل : 15/03/2011

مُساهمةموضوع: رد: قصه مغترب والزواج   الثلاثاء مايو 17, 2011 12:53 pm

منتظريييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييييين
بغض النظر عن النتيجة بس شوقتنا كتير وانت تكتب بكل براعة ولو استمريت كتبته حلقات مامملنا لاسلوب كتابتك الرائع والسلس
تخريمة
عشان هلالابى اخى ابوردة الشاكوش محمدك
ماتتاخر يااستاذ
الرجوع الى أعلى الصفحة اذهب الى الأسفل
محمد جمعة
مشــــرف
مشــــرف
avatar

عدد الرسائل : 3753
رقم العضوية : 85
1 :
تاريخ التسجيل : 25/03/2008

مُساهمةموضوع: رد: قصه مغترب والزواج   الثلاثاء مايو 17, 2011 1:10 pm

امانة ماوقع ........
غايتو انا حاسي طامة كبري جايه في الحلقة القادمة
قاعدين ومنتظرين البلوه
يديك العافية ياصحبي الرائع ابووردة

_________________



كل مايخص المنظمة هنا
اللهم اشفي ابنائنا عبدالمنعم وشهد انت الشافى



الرجوع الى أعلى الصفحة اذهب الى الأسفل
الهيثم
مشرف سابق
مشرف سابق
avatar

عدد الرسائل : 827
1 :
تاريخ التسجيل : 12/12/2007

مُساهمةموضوع: رد: قصه مغترب والزواج   الثلاثاء مايو 17, 2011 3:16 pm

أهـــــــــــــــــــا الراجــل وصل ولا لســـه Laughing

الرجوع الى أعلى الصفحة اذهب الى الأسفل
ابن بطوطة
عطبراوي بلاتيني
avatar

عدد الرسائل : 9217
رقم العضوية : 174
1 :
تاريخ التسجيل : 04/11/2008

مُساهمةموضوع: رد: قصه مغترب والزواج   الأربعاء مايو 18, 2011 5:20 am


شكلو كده مشى السودان لقاها اتخطبت ..
يا ابووردة تعال كمل قبل ما راسنا يودي ويجيب ..
(خصوصا وانك كنت تزمجر في اليمن) tongue


_________________


استغفر الله العظيم
الرجوع الى أعلى الصفحة اذهب الى الأسفل
عبدالفتاح بن سعيد
عطبراوي ذهبي
عطبراوي ذهبي
avatar

عدد الرسائل : 1023
1 :
تاريخ التسجيل : 21/04/2010

مُساهمةموضوع: رد: قصه مغترب والزواج   الأربعاء مايو 18, 2011 7:05 pm


ناس هناي توجد مواصلات بعد العرض .
الرجوع الى أعلى الصفحة اذهب الى الأسفل
محمد عبد الله عبد الجليل
عطبراوي ذهبي
عطبراوي ذهبي
avatar

عدد الرسائل : 1205
1 :
تاريخ التسجيل : 08/09/2010

مُساهمةموضوع: رد: قصه مغترب والزواج   الأربعاء مايو 18, 2011 10:59 pm

الخاذوق يطلع ليها ود عم ولا حاجه بالشكل دا اهلنا قالوا ان مسكت ماتفك ماتجى بكره تغنى
براى سويتا فى نفسى

_________________
الى العُلا ياعطبره
عطبره عطبره
يأم الكل
الرجوع الى أعلى الصفحة اذهب الى الأسفل
أبووردة
مشرف سابق
مشرف سابق
avatar

عدد الرسائل : 2567
1 :
تاريخ التسجيل : 15/05/2009

مُساهمةموضوع: رد: قصه مغترب والزواج   الخميس مايو 19, 2011 12:46 am

وبعديين وبعدين
كلما جابوا صينييه الفطور أشوف الطعميه وافتح السندوتش وأحشى الطعميه أشوفا جوه الشندوتش تعاين لى وتضحك أشم ريحتها جوه الشندوتش شمار والطعم سرتيه وقبل غادى أشوف علبة المربى قدامى أفتح الغطاء وأجيب المعلقه وقبل ما ألعق لسانى يهيج شعرا ونثر وتفوح الكلمات والقوافى بكل الحروف من نون والهاء والدال والراء وتمزج ويتقطر اللسان لعابا ومن علبة المربى كانت أول تحليه هذه القصيده الهائبه وتقول الكلمات


ومشيت على الخطوبه


والف الكون صباحيه
وأسل سيفك علي اللابسين
وبدله مغسولة مكوية
وأحزم وسطي بالعمة
وأخش ياالنسيب في اللمة
وأدافر الناس نهاريه
وأقول فيها الشعر غنوات
هي أحلي وأغلي سرتيه
كتب فيها البسوس أشعار
ورقصت ليها ناس ظبية وبديريه
أنا السودان تملي عليها مهريه
تفتش ليها في عمة وطاقيه
ونأس زرقاء وهنوشه وأم يمانيه
وناس ترحاب رووها امان وحنيه
وهترشه جاي يسأل وين
نجوم باكر تزغرد شايله طوريه
وعاشقه تجيها حفيانة
تغني ليها لوليه
اللول اللول يا لوليه
بسحروك يا بيضاء ومكويه
حتي الهجير من ضلوا جاك
للغالية بيادي التحية
شائل معاهو سديري صوف
تستأهلوا البيضاء الندية
والملاك عملت حكاية
غلبت اهل القراية
الا تأخذ فيها شده
حتي لو في المغربية
صمت سوت ليها معرض
اسمه لله الشكية
في هواها قلوبنا ذابت
مرهفة وتوته وذكية
اونلي جات زغرودة شاقه
شايله حنة ومحلبيه
عبده والجني استكانوا
عملوا ليها نشيد تحيه
حبي ليها شديد وظاهر
ما بدور نظرات قويه
دائرها و اختها في عيوني
وفي القليب ما عندىغيرها هديه

ودى كان فى التحليه
ونشوف بكره فى علبة الساردين والطحنيه
الرجوع الى أعلى الصفحة اذهب الى الأسفل
أبووردة
مشرف سابق
مشرف سابق
avatar

عدد الرسائل : 2567
1 :
تاريخ التسجيل : 15/05/2009

مُساهمةموضوع: رد: قصه مغترب والزواج   الخميس مايو 19, 2011 9:55 pm

وبعدين تستمر المسرحيه بعد الحليه نوم الضهريه تشوف عجايب مرات أقول أشوفها فى النوم ومرات ألعن بنت الجنيه ومرات أقول ذى دى ما بتجينى تجينى حبوبتها واقوم مخاع نامل ألقاها فى النوم بضبانتها والسرتيه ويجيبوا الغداء ملاح أم رقيقه وسلطه وأشوفها فى السلطه ياربى ياها أم عمتها أقول بسم الله وآكل واحس بأنها تاكل معاى واحمد الله الأكل دسم جدا الواحد براهو ما بيقدر ياكل براهو والملاح الطاعم دى لايوق لياقتى العجيبه ومنتظر بتين الدخله وبتين أشيل الورده فى الجنابيه وكل يوم يجيبوا العشى فى العشيه يوم الفول النعاس وجات فى المنام لابسه مكويه والنظاره الكبيره ميه الميه والنومه للصبح أبديه ويوم يكون العشاء باللبن نشاط الجم يروح النوم وألقى القلم فى يدى وهاك ياشعر والقصائد تتطاير بتين وبتين تنتهى المحلبيه وتطلع الكلمات بالقصيد هديه

يابنت يا الغربه فى دمك ميه

جننتيـــــــنى بتين تظهرى ليه

شوف المنــــــام بياض النيه

صورتك قدامى واقفه عتــــيه

وصورتى بين يدى الطعـــميه

تقع واحد والثانــــــيه حواليه

القلب يرجف واللسان سكريه

والشعر يتطايروالريحه صندليه

والعيــون تحلق متواليه عدديه

والرجلين عامله متواليه هندسيه

والمعادله الصعبه ممعادله أسيه

المغتربه لو طغت على فنجريه

الدنيا تنقلـب و المعادله الصفريه

البنت تكون لأمها كلام طمع ماديه

والأبودايمـا حيران القوامه للوليه

البنـت جات البلد والعيون مقطعيه

وعامله مصهينه ونامت على الصينيه

مشيت لود العم يدينى الخبر الثنيه

أقطع رأس جهينه باليقين النديه

أشوف أحلامى إتحققت مليونيه

للأسف كل الحكايه كانت شعيريه

وبعدــــيين نشوف باقى المسرحيه



الرجوع الى أعلى الصفحة اذهب الى الأسفل
محمد عبد الله عبد الجليل
عطبراوي ذهبي
عطبراوي ذهبي
avatar

عدد الرسائل : 1205
1 :
تاريخ التسجيل : 08/09/2010

مُساهمةموضوع: رد: قصه مغترب والزواج   الخميس مايو 19, 2011 10:23 pm

يازول ماتورينا الحصل شنوا

_________________
الى العُلا ياعطبره
عطبره عطبره
يأم الكل
الرجوع الى أعلى الصفحة اذهب الى الأسفل
yassir
عطبراوي مجتهد
عطبراوي مجتهد
avatar

عدد الرسائل : 268
1 :
تاريخ التسجيل : 15/03/2011

مُساهمةموضوع: رد: قصه مغترب والزواج   الجمعة مايو 20, 2011 3:09 pm

الشعب يريد معرفة الحاصل شنو
يااخوانا ماتلحقونا ابوردة ده شوفوه الحاصل عليه شنو بقى شغال فى الثانويات ونسانا بهنا والله ياربى دى حصص ليها هى وعاملنا شماعة
من اراد البحر استغل السواقيا
الرجوع الى أعلى الصفحة اذهب الى الأسفل
أبووردة
مشرف سابق
مشرف سابق
avatar

عدد الرسائل : 2567
1 :
تاريخ التسجيل : 15/05/2009

مُساهمةموضوع: رد: قصه مغترب والزواج   الجمعة مايو 20, 2011 10:19 pm

شكرا محمد عبدالله وشكرا ياسر على المرور الكمسارى لسع ما جاء وبوليس الحركه واقف فى الصينيه بكره تشوفوا ياولاد الفيس بوك ياريت تعتبروا وتتعظوا الغربه عندكم فيها ميزانيه المغتربه بتاعت الفيس بووك تعمل بيكم طوطاحنيه يا ما حتشوفوا أصبروا علينا شويه
الرجوع الى أعلى الصفحة اذهب الى الأسفل
ابن بطوطة
عطبراوي بلاتيني
avatar

عدد الرسائل : 9217
رقم العضوية : 174
1 :
تاريخ التسجيل : 04/11/2008

مُساهمةموضوع: رد: قصه مغترب والزواج   الجمعة مايو 20, 2011 11:20 pm

أبووردة كتب:
وبعديين وبعدين
كلما جابوا صينييه الفطور أشوف الطعميه وافتح السندوتش وأحشى الطعميه أشوفا جوه الشندوتش

أبووردة كتب:
وبعدين ...... ويجيبوا الغداء ملاح أم رقيقه وسلطه وأشوفها فى السلطه
دي بت ولا سريني ؟ tongue
.. كويس انك ما شفتها في بت الجيران ..
نصيحة : ما تكمل القصة وانت جعان


_________________


استغفر الله العظيم
الرجوع الى أعلى الصفحة اذهب الى الأسفل
ابوحازم
عطبراوي جديد
عطبراوي جديد
avatar

عدد الرسائل : 13
1 : الله كريم
تاريخ التسجيل : 20/05/2011

مُساهمةموضوع: رد: قصه مغترب والزواج   الأحد يوليو 03, 2011 4:47 am

ما تكمل ياخي يكمل صليبك ؟؟؟؟؟؟؟؟؟ حرقت دمناااااااااااااا بي تقطعك دا ؟
الرجوع الى أعلى الصفحة اذهب الى الأسفل
عبدالفتاح بن سعيد
عطبراوي ذهبي
عطبراوي ذهبي
avatar

عدد الرسائل : 1023
1 :
تاريخ التسجيل : 21/04/2010

مُساهمةموضوع: رد: قصه مغترب والزواج   الأحد يوليو 03, 2011 2:22 pm

ياحبيبنا أديها صبر وخلي صبرك طوييييييييييييييييييييييييييييييييييييييل ، بس تابع الفيلم والمتيم قال من الأول نحن ماورانا حاجة ، خلي روحك رياضية وكلنا نشوف وبكرة أحلى .
الرجوع الى أعلى الصفحة اذهب الى الأسفل
 
قصه مغترب والزواج
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
عاصمة الحديد والنار :: قـــسم الأدب والقصص والروايات :: منتدي القصص والروايات-
انتقل الى: